This page in English

Կացության Հատուկ Կարգավիճակ  

"Հայաստանի Հանրապետության Օրենքը Օտարերկրացիների մասին" ընդունվել է 2006թ. դեկտեմբերի 25-ին: Այն հնարավորություն է տալիս ծագումով հայ օտարերկրյա քաղաքացիներին, ինչպես նաև Հայաստանի Հանրապետությունում տնտեսական կամ մշակութային գործունեություն ծավալող այլ օտարերկրացիներին ստանալ Հայաստանի Հանրապետության Կացության Հատուկ Կարգավիճակ (ԿՀԿ):

ԿՀԿ տրվում է տաս տարի ժամկետով և կարող է տրվել մեկից ավելի անգամ:

 
Այն անձանց, ում շնորհվում է ԿՀԿ, տրվում է հատուկ տեսակի անձնագիր, որը հնարավորություն է տալիս առանց մուտքի արտոնագրի ճամփորդել Հայաստան և Հայաստանում օգտվել ՀՀ քաղաքացիների համար նախատեսված օրենքի ողջ պաշտպանությունից, իրավունքներից ինչպես նաև օրենքով սահմանված պարտականություններից:  Բացառություն են կազմում ընտրելու և ընտրվելու իրավունքները: ԿՀԿ ունեցողների վրա չի տարածվում նաև ՀՀ քաղաքացիների համար պարտադիր զինվորական ծառայությունը:

ԿՀԿ անձնագիրը հնարավորություն չի տալիս առանց մուտքի արտոնագիր այցելել ԱՊՀ անդամ այլ երկրներ: ԱՊՀ այլ երկրներ մուտք գործելու համար պետք է օգտագործել ազգային անձնագիրը:

Հայոց Ցեղասպանությունը վերապրածների համար ԿՀԿ անձնագիրը տրամադրվում է անվճար:

Ինչպես դիմել:

ԿՀԿ համար դիմողները ՀՀ դեսպանություն պետք է ներկայացնեն հետևյալ փաստաթղթերը.

1. Սահմանված ձևի դիմում, 

2. Նամակ ՀՀ դեսպանի անունով, որտեղ ԿՀԿ համար դիմողը պետք է մասնավորապես հայտնի հետևյալը տեղեկատվությունը.

. Ներկա քաղաքացիության վերաբերյալ,
. Նախկին քաղաքացիություն(ներ)ի վերաբերյալ` առկայության դեպքում, ինչպես նաև դրանցից զրկվելու պատճառները,
. Ծննդավայրի և ծնվելու պահին ստացած քաղաքացիության վերաբերյալ,
. ՀՀ ԿՀԿ համար դիմելու պատճառները` տնտեսական կամ մշակութային գործունեություն, բարեգործություն,
. Դիմելու պահին դիմողի մասնագիտության և ունեցած աշխատանքի վերաբերյալ,
. Նախկինում Հայաստանում դիմողի գտնված լինելու մասին տեղեկություն : Եթե նախկինում դիմողը Հայաստանում ունեցել է որևէ տեսակի կարգավիճակ` ժամանակավոր, մշտական, այդ մասին պետք է անպայման նշել,
. Դատվածության կամ քրեական հետաքննության մասնակցության վերաբերյալ:

3. Երկու նամակ-երաշխավորագիր համայնքային գործող կառույցներից, կամ Հայաստանի Հանրապետությունում կամ Լոնդնում ՀՀ  դեսպանությունում իրենց գործունեության շնորհիվ զգալի ներդրում ունեցող անհատներից,

4. Անձնագրի` նկարով էջի հստակ պատճեն` վեց (6) օրինակից,

5. Ծննդյան վկայականի պատճեն,

6. Անձնագրի լուսանկարի չափի յոթ (7) գունավոր լուսանկար:

Դեսպանի հավանությանն արժանանալուց հետո դիմումներն ուղարկվում են Երևան: Դիմումի ողջ ընթացքը սովորաբար տևում է 3-4 ամիս, սակայն բացառիկ դեպքերում կարող է տևել ավելի երկար: Փաստաթղթերը Երևան ուղարկելուց հետո ՀՀ դեսպանությունը գործընթացի վրա ազդեցություն չունի:

ԿՀԿ դիմումի մերժման դեպքում դիմողը կարող է նորից դիմել մերժման պահից մեկ տարի հետո:

ԿՀԿ ստանալու համար սահմանված պետական սակագինը ՄԹ-ում  219 բրիտանական ֆունտ է: Այն պետք է վճարել փոստային չեքով (Postal Order) կամ կանխիկ, դիմումը ՀՀ դեսպանությունում հանձնելու պահին: